من أهم الحاجات اللى خلتنى أفكر فى الرجوع للمدونة تانى .. ان فى ناس سألتنى انا اتعلمت تصوير ازاى ؟
و دا يفتح الباب ليا انى أبضن عليكم و أحكيلكم قصة كفاحى ...

"القصة ابتدت من زمان قوى ... و انا عيل صغير كنت محبوب جداً ... و كان كل البنات فى شارعنا بيحبوا يلعبوا معايا ... و يتخانقوا مع بعض مين فيهم اللى هتلعب معايا "عريس و عروسة" ... و دا لأنى كنت أحسن واحد بيلعب اللعبة دى ... و كنت مشهور جداً فى المدرسة .. و أهلى كانوا بيــــ ....."

اوكى .. أنا بحور ... ندخل ف الموضوع ...

من حوالى سنتين و شوية .. ان مكانوش 3 سنين ... مكانش عندى أى طموح انى أبقى أى حاجة ف الدنيا ... و كان أقصي آمالى انى اكمل دورة الحياة الطبيعية بتاعة أى بنى آدم هلاهوطة ( بيتولد - بيتعلم تعليم مالهوش لازمة - بيشتغل شغل هو مش بيحبه - بيتجوز - بيموت) .. لحد ما اكتشفت بالصدفة برنامج اسمه Movie maker .. و ده برنامج بدائى جداً بينزل مع الويندوز .. و تقريباً كان البرنامج ده هو الوسيلة اللى استخدمها الفراعنة فى المونتاج ...

و كان أول فيديو أعمله على البرنامج ده هو مزيكا فيلم تايتانيك على صورى و أنا بشرب شيشة ع القهوة ... و كان فيديو بضين .. الحمد لله انى مش لاقيه ... و لما حصلت حادثة مقتل خالد سعيد ... ساعتها قررت انى لازم أساعد بأى حاجة أقدر عليها ... و انى أعدى مرحلة البنى آدم الهلاهوطة و اعمل حاجة مفيدة ... و عملت أول فيديو ليه لازمة فى حياتى عشان خالد ممكن تشوفوه من هنا.

و بعد ما نزلت الوقفة الصامتة الأولى و سألت ناس هناك اذا كانوا شافوا الفيديو ولا لأ ... و اكتشفت انى ممكن أبقى قاعد فى البيت بلعب على الكيبورد .. و اللى بعمله ده فى ناس تانية تشوفه ... قررت انى هكمل حياتى بعمل فيديوهات.

و بم انى من المحظوظين اللى فقدوا ايمانهم بالتعليم فى مرحلة مبكرة ... فمجموعى فى الثانوية العامة مدخلنيش معهد السينما ... بس فى واحد صاحبي عرفنى ازاى أستغل الوقت اللى بكون فيه ع الانترنت فى انى أتعلم و كدة

أول حاجة ابتديت بيها كانت انى نزلت برنامج مونتاج احسن شوية من Movie maker ... و فى نفس الوقت مش معقد و مش محتاج كمبيوتر بامكانيات عالية زى البرامج الاحترافية .. البرنامج كان اسمه Sony Vegas Pro ... و اشتركت فى منتدى عربي مهتم بالبرنامج ده و فيه تقريباً كل حاجة أنا كنت محتاجها عشان أتعلم ... اسمه منتدى السونى فيجاس ... و فى الفترة دى كنت استلفت من خالتى 500 جنيه و اشتريت بيهم كاميرا ديجيتال صغيرة عشان أبتدى أًصور لنفسي الحاجات اللى أستخدمها فى الفيديوهات .. و بصراحة مش فاكر اذا كنت رديت الفلوس لخالتى ولا لأ ... (تحية كبيرة لخالتى يا جدعان)


أهم الأماكن اللى اتعلمت منها بقى
Youtube
أكتر موقع مهم ممكن تتعلم من عليه أى حاجة ... أى حاجة ... المهم تعرف تدور كويس على اللى انت عاوزه ..
من أهم الفيديوهات على يوتيوب اللى اتعلمت منها :

ورشة "الأفلامجية"
و دى ورشة كتابة سيناريو و اخراج عملها المخرج محمد دياب و المخرج عمرو سلامة و موجودة ممكن تتفرج عليها هنا

Ryan Connolly فى كل حلقة بيتكلم عن حاجة جديدة فى صناعة الأفلام ... لو اتفرجت على كل الحلقات من الموسم الأول .. هتلاقى نفسك بمجرد الفرجة بس هرشت الدنيا ماشية ازاى عشان تبتدى سكة صناعة الأفلام .. و من أحلى الحاجات انه بيعلمك ازاى تستخدم حاجات رخيصة أو موجودة عندك فى البيت عشان تعمل الأدوات اللى ممكن تستخدمها فى صناعة فيلمك من غير ما تضطر انك تصرف فلوس كتير.

البحث

من الحاجات العظيمة فى يوتيوب انك لو عرفت ازاى تدور على الحاجة اللى انت عاوزها ممكن تتعلم حاجات مش هيقولوهالك فى اى مكان هتاخد فيه كورس ... لأنك بكدة بتدور فى خلاصة خبرة ناس كتير من كل حتة ف العالم ... بمجرد ما تكتب How to و بعدها أى حاجة ف الدنيا .. هيطلعلك فيديوهات كتير لناس بتشرح اللى انت بتدور عليه ... و فى كمان كلمة Tutorial ... يعنى درس ... أو DIY ... و دى اختصار لـ"Do It Yourself" .. لو بتحاول تتعلم ازاى تعمل أى أداة تساعدك فى صناعة فيلمك.

من الحاجات اللى اتعلمت منها و ادتنى دفعة برضه انى أكمل فى اللى انا بحبه .. المقالات اللى ليها علاقة بصناعة السينما فى مدونة المخرج عمرو سلامة ... لف فيها لفة ... هتنبسط.

المشاهدة

من الحاجات المهمة برضه .. انك تتفرج كتير ... انا شخصياً مقتنع انك لازم تتفرج على أفلام كتير فشخ .. و خصوصاً من النوعية اللى انت بتحبها أو اللى انت نفسك تعمل زيها ... اتفرج كتير عشان عينك تاخد على الزوايا و حركات الكاميرا وأماكن الناس و الحاجات فى الكادر.

التجربة

 و دى بقى اهم حاجة عشان بعد اللى فات ده كله ماتكونش بتشتغل نفسك ... و بكدة تقدر تسمع آراء الناس فى شغلك .. و دى من أكتر الحاجات المفيدة ف انك تعرف الغلطات اللى وقعت فيها و تطورها.


بعد الهرى دا كله عاوز لامؤاخذة أحط ايدى على حاجة كدة .. و هى ان دى الطريقة اللى انا اتعلمت بيها .. ممكن تكون نفعت معايا بس ممكن مع حد تانى ماتنفعش ... و ممكن تكون بالنسبة لحد حاجات عادية جداً و مش كيميا يعنى ... و لحد تانى بداية لأنه يحط رجله على أول الطريق.

و أحب أضيف برضه .. انى مش بوعدك انك تبقى أفشخ مخرج أو مصور فى التاريخ بعد ما تعمل الحاجات اللى فوق دى ... بس أوعدك انك هتفهم الدنيا ماشية ازاى ... و انك هتقدر تحط رجلك على أول الطريق.