اتخنقت من الكمبيوتر و النت .. و الجهاز كمان كان بدأ يستهبل ... قولت مبدهاش ... رحت متصل بواحد صاحبي ...

انا : انت فين ياد ؟؟
صاحبي : و انت مالك بتكلمنى كدة ليه يابن التيييييت ( أصله يعزنى قوى )
انا : اصلى زهقان و عاوز أنزل شوية
صاحبي : انا هحضر حفلة حمادة هلال
انا : يا راجل !! ... طب بكام الحفلة دى ؟؟
صاحبي : التذكرة بأربعة جنيه و نص .. و عليها ست اكياس نسكافيه هدية
انا : لا يا معلم دا يبقى حمادة هلال تقفيل صينى مش بتاعنا
صاحبي : صينى ولا تايوانى .. دا هيبقى فيه هناك مزز للصبح ( طول عمره عملى )


انا قولت بقى أروح أشوف حفلة حمادة هلال ايه دى اللى باربعة جنيه و نص و عليها ست اكياس نسكافيه هدية
المهم روحت الاستاذ .. لقيت الدنيا مقلوبة ... و ناس أكتر من اللى كانوا موجودين لما غلبنا الجزاير أربعة صفر ... المهم انا مكانش معايا تذكرة .. و التذاكر كانت خلصت ... بس على مين ... قعدت رايح جاى على البوابات نص ساعة ... و بوابات تشيلنى و بوابات تحطنى ... لحد ما الشباب ( ربنا يديهم الصحة ) ضربوا امين شرطة لأنه مكانش عاوز يدخلهم رغم ان معاهم تذاكر ... و البوابة اتفتحت و دخلت ...
لقيت امم أكتر من اللى كانت برة الاستاذ ... ( متهيألى لو خدناهم و روحنا اسرائيل و كل واحد فيهم تف تفة واحدة هنحرر فلسطين ) ... و كان حمادة هلال لسة مجاش ... و الأخ بتاع الدي جي مشغل ( ابص لروحى فجأة ) و ( آه يانى يانى مش هعمل كدة تانى ) ... دمنهور بقى يا برنس

المسرح بقى كان فى وسط الملعب و قدامه اماكن الناس النضيفة .. قرايب فلان باشا و عيال علان باشا ... ما علينا بقى عشان قانون الطوارئ و الحركات دى

وصل حمادة هلال ... و اعتذر عن التأخير ... و قال انه وقف فى حتة اسمها ( طوخ ) يشترى حاجة .. راحت الناس مكسرة العربية بتاعته و عوروا واحد صاحبه ( امال لو شافوا شارون هيعملوا ايه ؟ ) ... طبعاً دا بعد ما بعد ما تفضل و شكر السيد محافظ البحيرة ... و اللواء معرفش ايه .. و معرفش مين باشا . ( ربنا يجعل كلامنا خفيف عليهم )

طبعاً انا طول ما انا واقف ببص على الناس اللى قاعدة قريب من المسرح بكل حقد و بقول " يا ولاد المحظوظة " ... و بعدين مكنتش لابس النضارة فمكنتش شايف حاجة غير شباب قاعدة تهيس و ترقص و تهز ايديها ... و بنات قاعدة تتظبط ... و بتوع البيبسي بيسترزقوا ... مش جو حفلات خالص ... قولت مابدهاش ... رحت رايح عند بوابة الناس النضيفة ... وقفت هناك شوية و و لقيت شباب مش عارفة تدخل برضه ... من هنا لهناك دخلنا ... اتقسمنا مجموعتين ... مجموعة بتجرى ناحية الناس النضيفة اللى قدام المسرح ... و مجموعة بتجري لضهر المسرح ( و انا منهم ) ... المهم وقفت شوية جنب المسرح فى مكان استراتيجى جامد ... و جه مخبر ابن تيييت و شدنى من التيشيرت الجديد رغم انه بخمسة و عشرين جنيه ابن الــ ... بس انا تقمصت شخصية الواد المسنود و رحت قايله " انت مش عارف انت بتكلم مين ؟؟ " ... و الجلالة خدتنى قوى بقى لحد ما اتأسفلى و سابنى مكانى كمان

شوية و حمادة هلال كان خلص و نازل من على المسرح ... و انا كان بينى و بين السلم حوالى مترين ( مش بقولكوا موقع استراتيجى ؟ ) ... المهم قولت أروح بقى أستناه عند السلم و أتصور معاه بقى بدل ما انا مقضيها تركيب صور مع الممثلين على الفوتوشوب ... فى ثانية واحدة كانت الدنيا اتقلبت و شباب متعرفش جات منين هجموا على السلم ... ( يعنى مش هتصور يا جدعان ولا ايه ؟؟ ) ... و لقيت أكتر من عشرين بودى جارد ( دا غير الأمن المركزى ) ملفوفين حوالين حمادة هلال و بيجروا ... و الشوية امناء شرطة على عساكر هم كمان بيجروا ورا الشباب ... و الشباب بتجرى من العساكر و امناء الشرطة ... و انا لقيت نفسي فى وسط البودى جاردات و بينى و بين حمادة هلال خطوة واحدة ... و لسة همد ايدى أسلم عليه ... لقيت صوت بيقول : " بيعمل ايه هنا ده ؟؟ " ... لقيت نفسي خير اللهم اجعله خير ... قال ايه مشوا الناس كلها بعيد ... و انا الموج حدفنى فى وسط البودي جاردات ... و لولا انهم كلهم لابسين أحمر و انا الواحيد اللى لابس أبيض كان زمان روحت مع حمادة هلال أصلاً ... المهم خدت نفسي و رحت على البوابة اشوف ايه النظام هناك لقيت فيه ناس برضه مستنية عند البوابة ... و في ناس كمان ركبت فوق العربية بتاعته ... ( الراجل خسر عربيتين فى يوم واحد ) ... و لقيت السواق بتاعه بيقول : " انتوا بلد فضيحة " ... و انا من منبرى هذا أحب أقوله " يا عم السواق welcome to Damanhour " ... المهم لقيت العملية بقى فيها أمن مركزى و قلة أدب ( من الشباب طبعاً اوعى حد يفهمنى صح ) ... رحت واخد بعضى و طيران على بيتنا ... و متهيألى ان لو الجيش لسة متدخلش يبقى حمادة هلال لسة محبوس دلوقت فى استاد دمنهور ... حد يروح يطلعه بقى

أحلى موقفين عجبونى ... وش حمادة هلال و هو نازل من على المسرح و الناس ملمومة عليه ... يا حبة عينى كان فاضله شوية و يعيط
و الموقف التانى لما عمل مفتح و قال للجمهور : " شربتوا نسكافيه النهاردة ؟؟ " ... الجمهور كله فى نفس واحد : " لأ "

و من هذا المزنق أحب أقول لكل فنان ( و خصوصاً لو كان عنده عيال عايز يربيهم ) ... اوعى تيجى دمنهور ... اسأل حمادة هلال
دا احنا يوم نور الشريف قفلوا شارع من أهم شوارع دمنهور و الناس فرشت على الأرض من قبلها بيوم !!

و انا مروح بقى استغربت على اللى انا عملته النهارة ده ( جرى و بهدله و نط من على السور ) ... رغم انى أساسا مبحبش حمادة هلال !!