مع كل يوم بيعدى عليا و مع كل خبر من الأخبار اللى بقراها .. بكتشف مدى التشابه بين النظام " اللاوندى " ( مش المصري خالص ها ) و بين النظام الاسرائيلى ... (( فى الغباء ))

اسرائيل بتخالف جميع القوانين العالمية و الانسانية فى اللى بتعمله فى الشعب الفلسطين ... من حصار و تجويع و قتل و اعتقالات ...
طبعاً النظام الاسرائيلي أكيد عارف ان اللى هو بيعمله ده يتعارض تماماً مع القوانين العالمية و الانسانية ... بس بيعمله !! (( دا غباء ))
النظام الاسرائيلى لما يضرب قافلة من المدنيين رايحين يودوا مساعدات لشعب محاصر ... (( دا يبقى غباء )) !!

نفس الكلام مع النظام " اللاوندى " ( مش المصرى و الله ) ... من سجن و حجر حرية الرأى و تعذيب و أحيانا قتل ... رغم انه عارف ان ده مخالف للقانون الانسانى و مخالف حتى للقانون اللى بيحكم " لاوندا " ( يعنى مش مصر ) ... (( يبقى دا غباء ))

و الحقيقة انا فى الكلام اللى فات ده بحاول أقنع نفسى انه (( غباء )) مش (( بلطجة )) ... يا رب يكون دا (( غباء )) مش (( بلطجة )) ...

عشان لو (( بلطجة )) يبقى مش هيقدر يمنعها غير واحد (( بلطجى )) ... و مظنش ان " لاوندا " ( و النعمة ماهى مصر ) ... فيها (( بلطجية )) ... أو بمعنى أصح (( لو كان فيها اللى يقدر يلم فرعون ... مكانش اتفرعن ))

أما عن ( ليه ) " لاوندا " ... فده عشان ( انا خايف ) ... أيوة خايف ...

لأن لو معييش واسطة تحمينى ... أو فلوس أشترى بيها الواسطة دى ... أو حزام اسود فى الكراتيه عشان أدافع عن نفسي ... أو معرفة معينة تولعلى الدنيا لو اتقبض عليا ... يبقى من الغباء انى مخافش ...

و انا مش غبى