( ك ط = 100 - 2ث ) ......
10:55 ص | 
كتبها لكم :
مهيج الجماهير
ملحوظة : البوست دا ممكن يكون بسبب انى من أيام رابعة ابتدائى مفتحتش كتاب ... و جيت دلوقت فى تانية كلية ذاكرت من غير ما أسخن شوية ....
قبل أى حاجة لازم كلنا نبقى متفقين على ان : ( ك ط = 100 - 2ث ) ...
و ان ( ك ع = -100 + 2ث ) ...
و ان التوازن يتحقق عندما : ( ك ط = ك ع ) ...
كلام جميل
انا نفسي أفهم بقى ( البنى آدم ) اللى حاطط المنهج ده ... و ( البنى آدم ) اللى سمح بتدريسه ... كانوا مفكرين ان مثلاً يعنى ممكن فى سنة من السنين أستفيد بالكلام ده ؟؟ ... سيبك من انى استفيد بيه فى شغلى ... الكلام ده لو لقيت شغل أساساً ... بس هل ممكن أستفيد بيه فى حياتى العامة ؟؟
يعنى انا ممكن مثلاً أدخل عند عم " محمد " البقال ... و أقوله :
" باتنين جنيه بيض الله يكرمك يا عم محمد "
يقوم هو يرد عليا و يقولى :
" لا و الله يا افندى مافيش بيض ... أصل اليومين دول ( ك ع = 50 + 2ث ) ... منهم لله ولاد الكلب "
فأرد عليه انا و انا بولع سيجارة و بحاول أتمالك اعصابي :
" يعنى ايه الكلام اللى انت قولته دا يا عم محمد ؟؟ ... و انجز عشان مش طايق نفسي "
يقولى و هو بيبصلى باستغراب :
" يا أفندى ماهو عشان التوازن يتحقق هنا لازم ( ك ط = ك ع ) ... لو عوضنا بقى هنلاقى ان :
ك ط = 100 - 2ث
ك ع = 50 + 2ث
بالتعويض فى قانون التوازن :
100 + 2ث = 50 + 2ث
50 = 4ث
يبقى ( ث = 12.5 )
عشان كدة يا باشا ... مافيش بيض "
محدش يلومنى بقى ساعتها و أنا بطفى السيجارة فى وش عم محمد ... أو و انا بكسرله صف سنانه التحتانى ... و انا قاعد بشتم فيه و فى اللى جابوه و اللى جابوا اللى جابوه
موقف تانى بسيط ... أنا فى ميكروباص ... و بلم الأجرة عشان البيه السواق يركز فى الطريق ( او يركز فى المزز اللى فى الطريق .. هو و نيته بقى ) ... و دا الحوار اللى دار أثناء لم الأجرة :
أنا بسأل البيه السواق :
" هى الأجرة كام يا اسطى ؟ "
هو بيرد عليا باستغراب و كأنى سألت على حاجة بديهية الناس كلها لازم تعرفها ( زى لون عيون نانسى عجرم مثلاً ) ... و يقولى :
" الأجرة 50 صاغ يا أفندى "
مش عارف ليه كلهم متفقين على انى ( أفندى ) ... رغم انى دايماً بلبس كاجوال يعنى ... يعنى ( كابتن ) تبقى ماشية أكتر ...
المهم بقى أنا أبدأ فى عملية لم الأجرة بالشكل التالى :
" بم أن ( ث = 50 ) و ( ع = 12 + النفرين اللى قدام )
بالتعويض فى قانون :
( ج = ث *ع )
و انا دلوقت معايا ( 10ث )
يبقى :
( 10ث * 12 + النفرين اللى قدام ) = ( 500 * 12 + النفرين اللى قدام )
اذاً : ( ج = 6000 )
يبقى فى اتنين مدفعوش الأجرة يا اساتذة "
متخيل أنا بقى السواق لما يسمعنى بلم الأجرة بتاعته بالطريقة دى انه يركن على أى جنب ... و ألاقى نفسي طاير من الميكروباص ...و أنا بسمع كمية شتايم متشتمهاش الحزب الوطنى من سنة 1978
اللى أقصده من الكلام ده ... انى نفسي مايجيش عليا اليوم اللى أقعد أندم فيه انى ضيعت سنين من عمرى و انا بحفظ حاجات زى ( ك ط = 100 - 2ث ) ... و فى الآخر الحاجات دى مكانها فى ورقة الاجابة .. و شكراً على كدة ...
طب ليه ؟؟
ليه ( البنى آدم ) اللى حط المنهج ده بيحاول يحولنى من ( طالب ) الى ( جردل ) ... و يقعد يملى فى الجردل ده من غير فهم ... لحد ما اللى فيه يقع على الأرض ؟؟
لو أنا بحفظ ان ( ك ط = 100 - 2ث ) ... عشان أنجح ... يبقى انا ممكن أنجح فى الامتحان ... بس غالباً مش هنجح ( بعد ) الامتحان .
لو أنا بحفظ ان ( ك ط = 100 - 2ث ) ... عشان آخد شهادة ... فأنا ممكن آخد الشهادة ... بس آخرها معايا فى برواز و تترمى على الحيطة ... أو أمسح بيها لامؤخذة ( ايدى ) بعد ما أخرج من الحمام .
أما بقى لو أنا بحفظ ان ( ك ط = 100 - 2ث ) ... عشان ألم الأجرة أو عشان أشترى باتنين جنيه بيض ... فأنا لا بلم الأجرة فى ميكروباصات ...
ولا بحب البيض ......
مفاتيح فك البوست :
( ك ط = كمية الطلب )
( ك ع = كمية العرض )
( ع = العدد )
( ث = الثمن )
ملحوظة :شكر خاص لأخويا الصغير انه سلفنى الآلة الحاسبة بتاعته عشان اكتب بيها البوست ده ......
الاشتراك في:
تعليقات الرسالة (Atom)
بسسسسسسسسسسست
انا ميييييين ؟؟
- مهيج الجماهير
- أقرع ... و صغير ... و بنضارة... فى كلية تجارة جامعة مفتوحة ... بحب التهييس قوى (( ممكن تقول انى لاسع )) ... بعزف موسيقى ... و بكتب ... و بقعد نت ... و بقرا ... فاضل انى امشى على الحيطة و ابقى بكدة ... رجل المستحيل
اقتراحات
ابحث فى المدونة
أنا فى CNN يا مينز
Translate My blog
فيس بوك بقى و حركات
Views
و وصلنا العالمية
شايفك
20 ♥♥ اكتب تعليقك ... بس متنساش تشكر فيا و كدة ♥♥:
ههههههههههههههههه
يخربيت دماغك
بتفصلنى
:))
;)
Go ON
كلامك كله صح بس أحمد ربنا أنت خلاص خلصت من التخريف ده لكن في غيرك لسه فيه و مضطر يذاكر و يحفظ عشان ينجح ربنا مع كل طلاب مصر و جميييييييييييييييلة بجد............
شكرت انا كده ولا ايه ؟؟؟؟
ميدو
:*
:P
بسنت
****
هو الحمد لله على كل شيء طبعاً
بس مين قالك انى خلصت ؟
انا لسة فى تانية كلية و شكلى مبلط فيها شويتين
:(
عامة ربنا معانا كلنا و على الله يكون بفايدة فى الآخر
بالنسبة للشكر و كدة
كويس بالنسبة لأول مرة
المرة الجاية ان شاء الله يبقى فى حماس أكتر
ههههههههههه
تحياتى
:)
iiiiiiiiiiiiiiii
كلنا كده
بندرس
حاجات
اللى بيدرسوا لينا لينا اصلا مش فاهمين
مدونه فوق الرائعه
محمود
****
ربنا يخليك يا باشا
حضرتك شرفتنى جداً و أتمنى تكرر الزيارة
تحياتى
:)
ده اللى بيحصل ف كل الكليات تقريباً للأسف
ربنا يخلصنا منها على خير
nice post & nice blog too
keep on :)
ايوه بس انت في كلية يعني برضه في حرية اكتر و براحتك لكن بعيد عنك انا في ثانوية و ربنا معانا كلنا و إن شاء الله ولا تبلط ولا حاجة و المرة الجاية الحماس يبقى اكتر :)
booba
*****
الف شكر دا من ذوقك بس
نورتى
و أتمنى تكررى الزيارة
تحياتى
:)
بسنت
****
لسة ثانوية عامة ؟
بصي نصيحتى ليكى حاولى تستمتعى بالأيمام اللى انتى عايشاها دلوقت
عشان الأغلبية العظمى بتحلف بأيام الثانوية العامة دى
أنا نفسي ترجع تانى و الله
و الكلية بقى انتى و حظك
و كله على الله
:)
استمتع ؟؟؟ أول حد يقولي كده بس ماشي هحاول والكلية بقى كل واحد و حظه ربنا يسهل و نخلص الثانوية بس :)
و الله هتحسى باللى أنا بقولك عليه ده لما تدخلى الكلية
و عامة اسألى أى حد يعنى
:)
رقصنى يا جدع
ههههههههههههههه
انا اول مره ادخل مدونتك لكن نالت اعجابى بشده
تعجبنى نظافه دماغك يا عبد الستار
احسن حاجه سيبك انت من التعليم
العلم فى الراس مش فى الكراس
ههههههههه
واخيرا
فرجاء اضافه هذا الرابط عندك فى المدونه لانه فى مصلحه لشباب كثيرين
ويكون لك خير واجر عظيم
http://jobs-egyptian.blogspot.com/
هذه مدونه وظايف لشبابنا اللى مش لاقى وظيفه
واتمنى نشرها بين المدونات
وشكرا
ربنا يسعدك
ههههههه
والله صادق يا احمد معاناتي حكيتها عني
انا بدرس الاقتصاد الكلي والجزئي والمجتمع وكله حاجات متل كذا
والله بحفظهم عشان انجح لنه مستحيل يدخلو دماغي "
اعطونا حاجه تنفعنا بدراسه وبعد الدراسه مو هبل علماءماتو واحنا لينا 100سنه نرددها وندرسها بلافايدةورح نبقى ندرسها الى مالانهايه
الله اعلم..
ميرسى احمد من قلبي"
ايه المدونة الحلوة دي !!
انا مبسوطة اني اكتشفتها !!
بجد يعني .. مبسوطة اوي ..:)
كل سنة و انت طيب
mrmr
****
ربنا يخليكى
و دا شرف ليا ان المدونة تعجبك
و ان شاء الله ماتكونش آخر زيارة يعنى
تحياتى
غير معرف
********
ربنا يخليك يا فندم
بس أنا اسمى خالد
:D
تحياتى
و نورت
قهوة بالفانيليا
***************
ربنا يخليكى
أنا و الله اللى ببقى مبسوط جداً لما المدونة بتعجب حد
نورتينى و أتمنى الزيارة تتكرر
تحياتى
هههههههه ,, دمك عسل
وكلامك مظبوط ,, هم فعلاً بيعمولا فينا كده ليه ؟؟!!
سال حبرك هنا وروانا بقطرا كاد الدمع
يستل منا امام تلك الكلمات العظيمه
فكم فخورين بك
كلمات حب
http://zawag.alnaddy.com/blog/article/266180
إرسال تعليق
من حقك تقول رأيك .... و من حقى أحبسك