أخذت خطوات الدكتور ( فلان ) تتسارع و هو يتجه نحو مكتب ( الدكتور الكبير قوى ) ... قابضاً بيده على ملف من الواضح أنه يحوى أوراقاً مهمة ... ثم طرق الباب و انتظر حتى أذن له ( الدكتور الكبير قوى ) بالدخول ... و لم يترك له ( الدكتور الكبير قوى ) فرصة للكلام ... حيث قال له :

" ها ... شفت الجثة و كتبت التقرير ؟؟ "

فارتسمت تلك الابتسامة الخبيثة على وجه الدكتور ( فلان ) ... و مد يده بالملف الى ( الدكتور الكبير قوى ) ... الذى أخذ يقراً المكتوب بلا مبالاة ... حتى توقف عند كلمة معينة و انعقد حاجبيه فى اشارة الى أنه لا يفهم معنى هذه الكلمة ... ثم رفع رأسه الى الدكتور ( فلان ) قائلاً :

" يعنى ايه اسفكسيا دى ؟؟ "

" انا عارف يا باشا ؟؟ ... هم قالولى اكتب اسفكسيا كتبت اسفكسيا ... بس واضح يعنى انها هتنضم ( للماس الكهربي ) و ( المختل عقلياً ) ... انت عارف يا باشا ... التجديد مطلوب برضه "

قالها الدكتور ( فلان ) موجهاً كلامه الى ( الدكتور الكبير قوى ) ثم اخذا يراجعا الأوراق حتى يتم تسليمها الى الجهة المختصة ... و بينما هم كذلك دخل الغرفة أحد الأطباء قائلاً :

" يا باشا جثة الراجل اللى عنده بواسير فى ( عينه ) مش قادر أعرفلها ملامح ... الراجل فيه كل اسباب الوفاة اللى خلقها ربنا ... مش قادر أحدد أى واحد فيهم بالظبط هو السبب الحقيقى للوفاة "

فرد الاثنان عليه فى نفس الوقت :

" اكتبها : اسفكسيا البواسير "

و ارتفعت أصوات ضحكاتهما و ترددت فى أنحاء المبنى ... المليء بالجثث التى بات الآن واضحاً ان سبب وفاة أصحابها سيكون :

اسفكسيا الجنسية المصرية .......


" ادخل "

قالها ( علان باشا ) بعد ان سمع طرقات على باب مكتبه ... فاندفع أحد الظباط الى داخل المكتب مؤدياً التحية العسكرية ... ثم قال :

" يا باشا العيال بتاعة الفيس بوك و المدونات دى مش عارفين نعمل معاهم حاجة ... مهيجين الدنيا علينا و نجحوا فى نشر القضية جوة مصر و برة مصر كمان ... بس من الواضح يا باشا انهم مش تبع أى تيارات سياسية ... و الا كانوا أعلنوا عن نفسهم بعد نجاحهم ده . "

فرفع ( علان باشا ) وجهه ناظراً فى عين الظبط باندهاش ... ثن قال :

" لما أنا أقول تبع تيارات سياسية يبقوا تبع تيارات سياسية ... و لما أقول انهم بياخدوا تمويل من برة يبقى دا بيحصل ... و اتفضل بقى من وشي ... و متجيش المكتب الا لما تعرفلى مين اللى ورا الجروبات دى "

" تمام يا فندم "

قالها الظابط ثم انصرف الى مكتبه بفكر فيما قال له ( علان باشا ) ... الذى رفع سماعة التليفون و طلب رقماً ... ثم قال محدثاً صاحبه :

" كله تمام يا فندم ... احنا قربنا نوصل للعلاقة بين شباب الفيس بوك و المدونات و بين الملف النووى لإيران ... لا يا باشا تعذيب ايه ؟؟ ... هو احنا بتوع تعذيب برضه ؟؟ ... احنا هنخليهم بعترفوا بطريقتنا "

ثم أكمل حديثه قائلاً :

" و النبي يا باشا تبقى تطلع بيان للرجالة بتوعنا يخفوا اديهم شوية على المواطنين ... عشان مصلحة الطب الشرعى بعتت بيان بأن الدكاترة مش عارفين يشتغلوا خالص فى الجثث اللى بنوردها ... و ان الموضوع بقى سهل قوى عليهم ... لأن الجثث بتبقى متشرحة جاهز ... و انت عارف يا باشا ... الايد البطالة نجسة "

أخذ ( علان باشا ) يكمل حديثه فى التليفون مع محدثه ... الذى كان يعلم بأن قضية ( خالد ) لن تمحى ابداً من ذاكرة من عاصروها ...
فقد كان يعلم جيداً أن الشعب المصري قد يتذكر ( خالد ) ... و لكن هذا قد يكون فى وقت ضحية التعذيب القادمة ...
و ما أن سرح بخياله بعيداً ... حتى رجع مسرعاً مفزوعاً ... فقد تخيل ابنه يدخل القسم لاستخراج بطاقة ...
و هو لا يملك واسطة ....
أو كوسة ...


على الغلاف من ورا :
- هل يكف ( المتجاوزين ) من جهاز الشرطة معاملتهم الغير آدمية للمواطنين ؟؟
- هل يضيع دم ( خالد سعيد ) ؟؟
- هل ستكون ( خالد سعيد ) القادم ؟؟
- هل يستيقظ الشعب المصرى من غفلته و يبدأ بالبحث عن حقوقه ؟؟
- هل تسقط ضحية اخرى للتعذيب فى مصر ؟؟

هذا ما سنعرفه فى جريمة القتل القادمة ( لو مبقناش رجالة و اتحركنا ) ... مع روايات أمنية للجيب : مع كل عدد جديد ... جريمة قتل جديدة ... و لغز جديد ... و متعة جديدة ....